Har gjort funn av omkomen person
Politiet bekreftar at det er gjort funn av ein død person.
Pressemelding 27.10.23:
Politiet bekreftar at det er gjort funn av ein død person i området der ein siste dagane har leita etter den sakna Amélie Michal Schenavsky.
Sidan tysdag 24.10.23 har ein leitt etter den sakna, tyske kvinna ved Romsdalseggen og i nærområdet.
- Vi har grunn til å tru at det er den sakna Amélie Michal Schenavsky som er funnen omkomen i dag, seier Roar Mordal Hilde, politistasjonssjef i Rauma og Vestnes.
Jegerar fann den omkomne
Den omkomne vart funnen ein kilometer nedanfor der det vart gjort funn av ein sovepose i går. Det er i ytterkanten av søksområdet.
- Funnet vart gjort av jegerar som var på jakt i området, fortel Mordal Hilde.
Den omkomne blir rutinemessig sendt til obduksjon for å få bekrefta sikker identitet.
I tillegg til politimannskap, drone og helikopter, har Røde Kors, Norsk folkehjelp og Norske Redningshunder vore med i søket.
Pressemelding 26.10.23:
Går over i ny søksfase
Politiet har leita etter den sakna Amélie Michal Schenavsky ved Romsdalseggen og i nærområdet sidan tysdag 24.10.23.
- Søket held fram både i dag torsdag, fredag og inn i helga. Likevel går vi no over i ein annan fase og leitar etter ein antatt omkomen person, seier Roar Mordal Hilde som er politistasjonssjef i Rauma og Vestnes.
Eit grundig, men krevjande søk
Det er gjort eit grundig søk både på bakken og frå lufta ved Romsdalseggen mot Venjedalen i Rauma kommune. Politiet har også oppmoda hytteeigarar om å sjekke hyttene sine området i tilfelle den sakna kunne ha teke seg dit. I tillegg til politimannskap, har drone, hundeekvipasje frå Norske redningshunder og helikopter vore med i søket.
- Det har vore krevjande å søke i området på grunn av terrenget og særleg føreforholda, fortel politistasjonssjefen.
Har gjort funn av sovepose
Det er gjort funn av ein sovepose i terrenget som det er grunn til å tru kan vere den sakna, tyske kvinna sin.
- Vi er kjende med at ho er eigar av ein slik sovepose. Det er eit viktig funn for oss som gir oss grunnlag for det vidare søksarbeidet, seier Roar Mordal Hilde.
Om nokon har observasjonar av den sakna kvinna, ta kontakt på tlf. 02800.
Pressemelding 24.10.23:
Leitar etter sakna kvinne
- Vi har starta søk med drone og politimannskap for å leite etter den sakna kvinna, seier politiinspektør Anders Skorpen-Trøen i Møre og Romsdal politidistrikt.
Politiet fekk i går, måndag 23. oktober melding om at Amélie Michal Schenavsky ikkje returnerte til Oslo som avtalt. Ho skal ha vore på tur frå Oslo til Åndalsnes i Rauma kommune. Siste sikre observasjon er på Romsdalseggen 19. oktober.
- Politiet vil leite på Romsdalseggen med drone i dag. I tillegg vil vi undersøke om ho kan ha tatt seg til hytter i nærleiken av Romsdalseggen, legg Skorpen-Trøen til.
Den sakna kvinna er 26 år, 160 cm høg og har mørkt brunt hår.
Om nokon har observasjonar av henne, ta kontakt på tlf. 02800.