Du har som regel rett til å få varsla dei du bur saman med eller ein annan du peikar ut, seinast to timar etter at du blei ført inn til politistasjonen eller lensmannskontoret.
Politiet kan likevel utsetje varslinga dersom det kan vere til vesentleg skade for etterforskinga av saka.
Er du under 18 år, vil politiet vanlegvis varsle familien din uavhengig av ønsket ditt.
Er du utanlandsk statsborgar, har du rett til å varsle ambassaden eller konsulatet til landet ditt om at du er pågripen.

Du har rett til å kontakte ein advokat om at du er pågripen, seinast to timar etter at du blei ført inn til politistasjonen eller lensmannskontoret.
Du har rett til sjølv å velje kva advokat du vil varsle.

Du har plikt til å oppgi namn, fødselsdato, fødselsår, stilling og bustad når politiet ber om det. Utover dette har du ikkje plikt til å forklare deg for politiet.
Du kan nekte å forklare deg heilt eller berre forklare deg om enkelte spørsmål.

Blir du ikkje lauslaten, må politiet snarast mogleg og seinast den tredje dagen etter pågripinga la ein dommar ta stilling til om du framleis skal vere fengsla.
Vanlegvis vil du bli framstilt for ein dommar dagen etter at du blei pågripen.

Du har rett til å få ei rein madrass og teppe dersom du må vere i politiarresten over natta.
Dersom politiet meiner det kan innebere ein sikkerheitsrisiko for deg at du får madrass og teppe, kan dei utsetje å gi deg dette.

Du har rett til å ta kontakt med helsepersonell seinast to timar etter at du blei ført inn til politistasjonen eller lensmannskontoret.
Ringer du sjølv til helsepersonell, har politiet rett til å kontrollere at det er dei som svarar på telefonen. Deretter har du rett til å samtale direkte med helsepersonellet utan å bli kontrollert.

Rettar og plikter dersom du blir brakt inn

Rettar og plikter som pågripen